Deu 5 | NdeIBE | STEP | UMosi wamema wonke u-Israyeli wathi kuye: “Zwana, O Israyeli, izimiso lemithetho engizayethula ngesibopho phambi kwakho lamuhla. Ifunde njalo ube leqiniso ukuthi uyayilandela.

Deuteronomy 5

Imilayo elitshumi

1 UMosi wamema wonke u-Israyeli wathi kuye: “Zwana, O Israyeli, izimiso lemithetho engizayethula ngesibopho phambi kwakho lamuhla. Ifunde njalo ube leqiniso ukuthi uyayilandela. 2 UJehova wethu wenza isivumelwano lathi eHorebi. 3 Kwakungasibo obaba bethu uJehova enza isivumelwano labo, kodwa wasenza lathi, kuyithi sonke esisaphilayo esikhona lamuhla. 4 UJehova wakhuluma lawe likhangelene ubuso ngobuso ephakathi komlilo phezu kwentaba. 5 (Ngaleso sikhathi ngema phakathi kukaJehova lawe ukuze ngikwethulele ilizwi likaJehova, ngoba wawusesaba umlilo njalo awuzange ukhwele entabeni.) njalo wasesithi:

6 “NginguJehova uNkulunkulu wakho owakukhipha eGibhithe, waphuma elizweni lobugqili.

7 “Ungabi labanye onkulunkulu ngaphandle kwami.

8 “Ungazenzeli isithombe ngesimo saloba yini esezulwini phezulu loba emhlabeni phansi loba emanzini ngaphansi. 9 Ungazikhothameli loba ukuzikhonza; ngoba Mina, uJehova uNkulunlunkulu wakho, nginguJehova olobukhwele, ojezisa abantwana ebajezisela izono zaboyise kuze kube yisizukulwane sesithathu lesesine sabangizondayo, 10 kodwa ngitshengisela uthando kuzizukulwane eziyinkulungwane zalabo abangithandayo njalo abagcina imilayo yami.

11 “Ungalisebenzisi ngeze ibizo likaJehova uNkulunkulu wakho, ngoba uJehova kayi kumyekela olecala lokusebenzisa ibizo lakhe ngeze.

12 “Gcina usuku lweSabatha ulwenze lubengcwele njengokulaywa kwakho nguJehova uNkulunkulu wakho.

13 Okwezinsuku eziyisithupha uzasebenza wenze yonke imisebenzi yakho, 14 kodwa usuku lwesikhombisa luyiSabatha kuJehova wakho. Ngalolosuku awuyikwenza imisebenzi loba yiphi, wena ngokwakho, amadodana akho loba amadodakazi akho, izisebenzi zakho zesilisa loba ezesifazana, izinkabi zakho, obabhemi bakho loba yisiphi isifuyo sakho, lesethekeli egumeni lakho, ukuze izisebenzi zakho ezesilisa kanye lezesifazana ziphumule, njengawe.

15 Khumbula ukuthi wawuyisigqili eGibhithe lokuthi uJehova uNkulunkulu wakho wakukhipha khona ngesandla esilamandla lengalo eyelulekileyo. Ngalokho uJehova uNkulunkulu wakho ukulaye ukuthi ugcine usuku lweSabatha.

16 “Hlonipha uyihlo lonyoko, njengokulaywa nguJehova uNkulunkulu wakho, ukuze ubempilonde lokuthi kukuhambele kuhle elizweni uJehova uNkulunkulu wakho akunika lona.

17 “Ungabulali.

18 “Ungafebi.

19 “Ungantshontshi.

20 “Ungafakazi amanga ngomakhelwana wakho.

21 “Ungafisi umfazi kamakhelwana wakho. Ungahawukeli indlu kamakhelwana wakho loba isiqinti sakhe, isisebenzi sakhe sesilisa loba esesifazana, inkabi yakhe loba ubabhemi wakhe loba kuyini okukamakhelwana wakho.”

22 Le yiyo imilayo eyatshiwo nguJehova ngelizwi eliphakemeyo liphuma elangabini lomlilo leyezi kanye lomnyama owesabekayo; lina libuthene lonke entabeni, njalo kazange engezelele lutho. Ngakho wasekubhala konke lokhu ezibhebhedwini ezimbili zamatshe anginika zona.

23 Lathi lisizwa ilizwi livela emnyameni, intaba ivutha amalangabi omlilo, wonke amadoda angabakhokheli labadala bezizwana zenu beza kimi. 24 Lathi, “UJehova wethu usitshengisile inkazimulo yakhe kanye lobukhosi bakhe, njalo sizwile ilizwi lakhe livela elangabini lomlilo. Lamuhla sesibonile ukuthi umuntu angaphila noma eke wakhuluma loNkulunkulu. 25 Kodwa khathesi, kanti sizafelani pho? Umlilo omkhulu kangaka uzasiqeda du, njalo sizakufa nxa singaphinda sizwe ilizwi likaJehova uNkulunkulu wethu.

26 Ngoba ngubani umuntu wenyama onjengathi owake wezwa ilizwi likaNkulunkulu ophilayo ekhuluma ephakathi komlilo, waphila na?

27 Sondela eduzane ulalele lokho okutshiwo nguJehova uNkulunkulu wethu. Ube ususitshela lokho uJehova uNkulunkulu wethu azakutshela khona. Sizalalela silandele.”

28 UJehova walizwa ekukhulumeni kwenu lami wasesithi kimi, “Ngizwile okutshiwo ngabantu kuwe. Konke abakutshiloyo kulungile.

29 Sengathi ngabe izinhliziyo zabo ziba lokungesaba ukuze bayigcine imilayo yami, kubalungele bona kanye labantwababo kuze kube lanini nini!

30 “Hamba uyebatshela ukuthi babuyele emathenteni abo. 31 Kodwa wena hlala khonapha lami ukuze ngikuphe yonke imilayo, izimiso lemithetho ozabafundisa ukuthi bayigcine bayilandele elizweni lelo engizabanika lona ukuba libe ngelabo.”

32 Ngakho nanzelelani lenze lokho uJehova uNkulunkulu wenu alilaya ngakho; lingaphambukeli yiloba kwesokudla loba kwesenxele. 33 Hambani ngaleyondlela uJehova wenu alilaye ngayo, ukuze liphile liphumelele njalo lengezelele izinsuku zenu elizweni elizakuba ngelenu.